La Rait Svizra d’istoricras è naschida il mars 2019 or dal basegn da promover scienziadas* da l’istorgia e render pli visibla lur lavur. Suenter ina pausa pervia da la pandemia da COVID-19 è la rait vegnida restructurada l’enviern 2020. En quest connex èn era sa furmadas la nova pagina da web e la cumposiziun actuala da la suprastanza.
Pervia da l’omosozialitad ch’è creschida istoricamain e ch’influenzescha dinamicas socialas vegnan dunnas* promovidas pli pauc. In fatg che na vegn betg a sa midar da sulet en favur da las dunnas, sch’ins examinescha ils dumbers davart posiziuns da cader e professuras: La quota da dunnas en la perscrutaziun publica e privata en Svizra giascha il pli sut la media europeica; gnanc 25% da las professuras vegnan occupadas da dunnas (Uffizi federal da statistica, dumbers per 2019, u She Figures per dumbers per 2018).
Quest fatg midain nus ussa sezzas*. Tenor Iris Bohnet, l’autura da “What Works. Wie Verhaltensdesign die Gleichstellung revolutionieren kann”, èn raits in med da promoziun che para spezialmain adattà per dunnas, tranter auter perquai che models da rolla feminins en posiziuns pli autas sajan usché rars (Bohnet, 2016, p. 101s.).
La Rait Svizra d’istoricras è ina community da dunnas* che profiteschan vicendaivlamain ed entran en contact via la rait, per uschia barattar experientschas e reussir d’avanzar lur carrieras. Cun agid da diversas prestaziuns duai la rait porscher ina plattafurma, sin la quala istoricras* pon far pli visibla lur lavur e la pon amplifitgar e discutar. Pervia da la “Leaky Pipeline” fan blers instruments da promoziun logicamain pir effect pli aut sin la stgala da carriera. Perquai èsi per nus ina mira explizita da sustegnair strategicamain istoricras* futuras* già durant il studi da master.
